Paralimpiya o'yinlari. Dzyudochilarimizdan yana bitta oltin medal!

To'rt yillikning nufuzli musobaqasida O'zbekiston Paralimpiya terma jamoasining 32 nafar sportchisi 5ta sport turida yurtimiz sharafini himoya qilyapti.

Quvonarlisi, dzyudo musobaqasining ilk kuniyoq polvonlarimiz uchun o'ta omadli keldi. Avvaliga erkaklar o'rtasidagi 60 kg vazn toifasida tatamiga chiqqan hamyurtimiz SHerzod Namozov barcha raqiblarini mag'lubiyatga uchratib, terma jamoamizga dastlabki oltin medalni taqdim etgandi.

SHundan so'ng, -66 kg vazn toifasidagi dzyudochimiz O'tkirjon Nig'matov ham Paralimpiya o'yinlari chempioniga aylandi. U hal qiluvchi final bellashuvida ozarbayjonlik Bayram Mustafaevni mag'lubiyatga uchratib, shoxsupaning eng yuqori pog'onasiga ko'tarildi.

Nig'matov finalga qadar puertarikolik Luiz Dias Peres, ukrainalik David Xoravani taslim etgan edi. Bu vaznda bronza medallar Xorava hamda yaponiyalik Satoshi Fujimotoga nasib etdi.