Paralimpiyachilarimiz ertaga tongda Toshkentga qaytishadi

Paralimpiyachilarimiz joy olgan samolyot ertaga soat 06.15da Toshkent xalqaro aeroportiga kelib qo'nadi. Paralimpiya terma jamoamiz ham xuddi Olimpiadada ishtirok etgan sportchilarimiz singari katta tantana bilan kutib olinadi.

Eslatib o'tamiz, to'rt yillikning eng nufuzli musobaqasida 5ta sport turida 32 nafar sportchi bilan ishtirok etgan paralimpiyachilarimiz yakunda tarixiy natijani qayd etishgandi. Ana shu 32 nafar sportchimiz musobaqada jami 31ta medalni qo'lga kiritgan edi.

Medallardan 8tasining oltin ekanligi har birimizga faxru iftixor baxsh etadi. SHuningdek, terma jamoamiz hisobida yana 6ta kumush hamda 17ta bronza medali ham bor. Yakunda paralimpiyachilarimiz 16-o'rinni egallashgandi.

Ushbu natijasi evaziga O'zbekiston terma jamoasi Osiyo qitasida umumjamoa hisobida birinchi o'rinni egallagan Xitoydan so'ng ikkinchi pog'onani band etdi. Mustaqil Davlatlar Hamdo'stligi mamlakatlari orasida esa Ukrainadan so'ng ikkinchi o'rinni egalladik. Ukraina umumjamoa hisobida kuchli uchlikdan joy oldi.

Terma jamoamizga eng ko'p oltin medallarni dzyudochilarimiz taqdim etishdi. O'z vazn toifalarida SHerzod Namozov, O'tkirjon Nig'matov, Odil Tulendiboev barcha raqiblarini mag'lubiyatga uchratib, shoxsupaning eng yuqori pog'onasiga ko'tarilishdi.

Bundan tashqari, disk uloqtirish bahslarida Husniddin Norbekov, nayza uloqtirishda Aleksandr Svechnikov hamda Nozimaxon Qayumova, suzish musobaqasida Fotimaxon Amilova va Firdavsbek Musabekovlar ham oltin medal bilan taqdirlanishdi.

Bizdan avvalgi o'rinni egallagan Eron va Kanada terma jamoalari hisobida ham 8tadan oltin medal bor. Bir yuz ettita oltin, 81ta kumush, 51ta bronza, jami 239ta medal jamg'argan Xitoy terma jamoasi katta farq bilan birinchi o'rinni egalladi.

Ikkinchi pog'onani band etgan Buyuk Britaniya Paralimpiya terma jamoasi hisobida jami 147ta medal bor. SHulardan 64tasi oltin, 39tasi kumush, 44tasi bronza medalidir. Kuchli uchlikka Ukraina terma jamoasi 41ta oltin, 37ta kumush, 39ta bronza medali bilan yakun yasagan.

Jami 63ta davlat terma jamoalari kamida bitta oltin medalni qo'lga kiritishdi. Etmish ikkita terma jamoa kamida bittadan kumush medalga ega bo'ldi. Sakson uchta terma jamoa esa kamida bittadan bronza medaliga ega chiqdi.