Qoyil! Bokschilarimiz umumjamoa hisobida birinchi bo'lishdi!

To'rt yillikning eng nufuzli musobaqasida bokschilarimiz yaxshigina shov-shuv ko'tarishga muvaffaq bo'lishdi. To'liq tarkib, yani 10ta vazn toifasida ishtirok etgan charm qo'lqop ustalarimizdan 7 nafari g'olib va sovrindorlar safidan joy oldi.

Ulardan 3 nafari Olimpiada chempioni degan yuksak unvonga sazovor bo'lishdi. Hasanboy Do'smatov, SHahobiddin Zoirov va Fazliddin G'oibnazarov o'z vazn toifalarida olimpiya o'yinlari chempioniga aylanishdi.

SHahram G'iyosov va Bektemir Meliqo'ziev kumush medalni qo'lga kiritgan bo'lsa, Rustam To'laganov hamda Murodjon Ahmadaliev bronza medallari bilan taqdirlanishdi.

Bizdan keyingi ikkinchi o'rin Kuba terma jamoasiga tegishli bo'ldi. Ozodlik oroli bokschilaridan 3 nafari oltin medalga sazovor bo'ldi. Kubaliklarda yana 3ta bronza medali ham bor. Kuchli uchlikka Franciya terma jamoasi 2ta oltin, 2ta kumush, 2ta bronza medali bilan yakun yasadi.

Keyingi o'rinlarni tarkibida bir nafardan Olimpiada chempioni bo'lgan Qozog'iston, Rossiya, Buyuk Britaniya va Braziliya terma jamoalari yakun yasagan. Umuman olganda, boks musobaqasida jami 18ta terma jamoa kamida bitta bronza medali bilan uyga qaytadigan bo'ldi.