Rafa Nadal Open. Cultonovda kambek evaziga 1/2 finalga chiqdi

Mukofot jamg'armasi 74,825 evroni tashkil etuvchi ushbu turnirda hamyurtimiz Humoyun Sultonov ham muvaffaqiyatli odimlayapti. Rafa Nadal Open by Movistar turniri tennis afsonasi Rafael Nadal tomonidan tashkil etilayotgani bilan ham ahamiyatli hisoblanadi. 

Sultonov ushbu turnirning asosiy to'riga saralash bahslaridagi g'alabasi evaziga etib kelgandi. Mamlakatimizning birinchi raketkasi ketma-ket uchta g'alabadan so'ng musobaqaning 1/2 finaliga yo'l oldi. Kecha u 1/4 finalda iordaniyalik Abedallah SHelbayhni irodali tarzda mag'lub etdi. Birinchi setni boy bergan tennischimiz yakunda g'alabani ilib ketdi - 2/6, 7/5, 6/2. 

Taqqoslash uchun, o'tgan hafta US Open saralash bahslarida bir g'alaba va bir mag'lubiyat qayd etgan SHelbayx dunyoning 215-raketkasi bo'lib turibdi. Sultonov esa ATP reytingida 264-pog'onadan joy olgan. Kechagi uchrashuvda Humoyun 7, Abedallah esa 6 ta eys zarbasini amalga oshirgan. Qo'shxatolar Humoyunda ko'proq bo'ldi - 5 ga 3.      

Bugun vatandoshimiz musobaqaning 1/2 finalida dunyoning 134-raketkasi bo'lib turgan xorvatiyalik Duye Aydukovichga qarshi kortga chiqadi. Ushbu uchrashuv bizning vaqt bilan soat 21:30da boshlanadi. Bu tennischilarning o'zaro ikkinchi to'qnashuvi bo'ladi. 2022 yilning 22 aprel kuni Xorvatiyaning Split shahrida o'tkazilgan turnirning 1/4 finalida Humoyun 2/6, 7/5, 6/3 hisobida g'alaba qozongandi. O'shanda Aydukovich turnirning birinchi, Sultonov esa beshinchi raketkasi edi.