Rasman: Ahmadaliev - Roman jangi tasdiqlandi, o'rtaga WBA va IBF kamarlari qo'yiladi FOTO

Xabar berganimizdek, ushbu kutilgan chempionlik jangi 13 sentyabr kuni AQSHning Nyu-York shahridagi “Medison Skver Garden” arenasida bo'lib o'tadi. Malumot har ikki bokschining promouter hamda menejerlari tomonidan rasman tasdiqlandi. 

Janglarni qayd etib boruvchi dunyoga mashhur boxrec.com saytida Ahmadaliev - Roman to'qnash keluvchi boks oqshomi rasmiy ravishda o'z tasdig'ini topgan. Hozirda bu engil vaznda amerikalik Daniel Roman WBA va IBF chempionlik kamarlari sohibi bo'lib turibdi.

WBA reytingida birinchi o'rinni egallab turgan Ahmadaliev rasmiy davogar sifatida 29 yoshli Romanga qarshi ringga ko'tariladi. O'rtaga shuningdek, Danielga tegishli IBF kamari ham qo'yiladi. Murodjon prof boksdagi ettinchi jangidayoq bir yo'la ikkita chempionlik kamarini qo'lga kiritish imkoniyatiga ega bo'ldi. 

Malumot uchun, 24 yoshli Murodjon Ahmadaliev professional boksdagi debyutini 2018 yilning 10 mart kuni nishonlagan. Oltita jangning barchasida g'alaba qozongan. Beshta jangda raqiblarini nokautga uchratgan.

2010 yili prof ringda debyut qilgan Roman esa shu kungacha 30 ta jang o'tkazgan. Hisobida 27 ta g'alaba, 2 ta mag'lubiyat va bitta durang bor. O'nta jangda raqiblarini muddatidan avval mag'lubiyatga uchratgan. So'nggi bor 2013 yilning 18 oktyabr kuni mag'lubiyatga uchragan.