Rasman. WBA Naoya Inoue - Murodjon Ahmadaliev jangiga buyruq berdi!

Tashkilot tomonlarga rasmiy xat yuborib, har ikki jamoaga jang haqida xabar berdi. Muzokara uchun 30 kun muxlat berildi, muddat 14 iyul kuni tugaydi.

Reglamentda aytilishicha, chempion kamarni qo'lga kiritgan kundan boshlab to'qqiz (9) oy ichida mavjud bo'lgan eng yaxshi davogarga qarshi unvonini himoya qilishi kerak.

Inoue 2023 yilning 26 dekabrida chempionlikni qo'lga kiritgan va uning navbatdagi majburiy himoyasi shu yilning 25 sentyabridan kechiktirmay o'tkazilishi kerak. WBA yo'nalishidagi majburiy davogar esa aynan hamyurtimiz Murodjon Ahmadaliev bo'lib turibdi.

Agar belgilangan muddatda kelishuvga erishilmasa yoki tomonlardan biri jangni imzolashdan bosh tortsa, qo'mita ichki qoidalariga muvofiq promouterlar o'rtasida kim oshdi savdosi o'tkazadi.

Malumot uchun, WBA va IBF yo'nalishlarida sobiq jahon chempioni bo'lgan Murodjon Ahmadaliev AQSHda mashg'ulotlarni davom ettirmoqda.