Sergey Kovalyov: “Abror Tursunpo'latov yordamida yana jahon chempioni bo'laman”

Xabaringiz bor, Tursunpo'latov Rio-2016 Olimpiadasi chempioni Fazliddin G'oibnazarovning murabbiyi hisoblanadi. Kovalyov ketma-ket so'nggi ikkita jangida amerikalik Andre Uordga yutqazib qo'ygan va buning natijasida jahon chempionlik kamarlarini boy bergandi.

“Ukrainalik Vyacheslav SHabranskiga qarshi o'tkazadigan jangimga tayyorgarlik reja asosida davom etyapti. Bu borada menga yangi murabbiyim Abror Tursunpo'latov yaqindan yordam beryapti. Bu mutaxassis bilan hamkorlikda ishlayotganimdan xursandman.

Biz bir-birimizni juda yaxshi tushunamiz, til borasida ham hech qanday muammo yo'q. Biz birgalikda muvaffaqiyatga erishamiz va men yana jahon chempionlik kamarlarini qo'lga kirita olaman”, - dedi rossiyalik sobiq jahon chempioni Sergey Kovalyov.

Eslatib o'tamiz, Kovalyov 25 noyabr kuni AQSHning Nyu-York shahrida ukrainalik Vyacheslav SHabranskiga qarshi ringga ko'tariladi. G'oibnazarov esa 9 dekabr kuni amerikalik Stiven Ortizga qarshi 8 raundlik jangda ringga chiqadi.

Bu jang Nyu-York shahridagi dunyoga mashhur Madison Square Garden arenasida bo'lib o'tadi. Oqshomning markaziy jangida ukrainalik jahon chempioni Vasiliy Lomachenko o'z chempionlik kamarini himoya qiladi.