SHahram G'iyosov: "Ushbu g'alaba menga jahon chempionlik kamari uchun jang qilish imkonini beradi"

"Jang qiziqarli kechdi. Raqibim juda kuchli va chidamli bokschi ekan. Birinchi raundda menga yaxshigina qiyinchilik tug'dirdi. Lekin shunga qaramay, men keyingi raundlarda o'z xarakaterimni ko'rsatishga erishdim. O'zbeklarning qanday chidamli, mehnatkash ekanligini isbotlashga harakat qildim. Jang to'liq o'n raund davom etgan bo'lsa, hakamlar raundlardan to'qqiztasini meni foydamga hisoblashdi, raqibim bor-yo'g'i bir raundda ustunlikka erishdi. Yakunda, ochkolar hisobida men g'alaba qozondim. G'alabam evaziga WBA Intercontinental kamari sohibiga aylandim. Bu g'alabam menga jahon chempionlik kamari uchun jangga chiqishimga imkon beradi. Nasib qilsa, jahon chempionligi kamarini yurtimizga olib kelaman. 

G'alabaga erishish uchun uzoq tayyorgarlik ko'rdik. AQSHda uch oy davomida to'liq kuch bilan ishlashga harakat qildim. Men uch oy davomida ikki bor ringga ko'tarildim. Dastlabki jangim Meksikada o'tkazildi. Keyingi jangim juda kuchli bokschi bilan bo'lishini bilardik, shunga qaramay biz u bilan jang qilishni istadik. Raqibim menga qadar uchta o'n ikki raundlik jangda ishtirok etib, ularning barchasida g'alaba qozongandi. Uning kuchiga shubha qilmasdik, lekin men o'zimga ishondim va u bilan jang qilishga rozilik berdim. 

Murabbiylarim, promouterim menga ishonishligini aytishdi. Men eplashimni his qildim. Bu g'alabam katta qadam bo'ldi. Ushbu natijalarga erishishni orzu qilardim, kamdan-kam bokschilar professional boksda bunday natijalarni erishadi. Boksda doim jarohatlar, zarbalar bo'ladi, bundan qochib bo'lmaydi. Lekin, mehnat qilishdan to'xtamasangiz, siz niyat qilgan marrangizga erishasiz. 

O'tgan jangda xatolarimni ko'rdim, keyingi safar bu xatolarni qilmaslikka harakat qilib, yanada ko'proq o'z ustimda ishlashga vada beraman", - dedi SHahram G'iyosov.