SHofirkonliklarning quvonchi cheksiz

Tadbirda Buxoro viloyat hokimi Botir Zaripov boshchiligidagi sektor rahbarlari, tuman aholisi, keng jamoatchilik vakillari hamda yoshlar qatnashdi. Tantanali marosimda so'zga chiqqan viloyat hokimi Botir Zaripov shofirkonliklarni zamonaviy qiyofaga kirgan sport majmuasining foydalanishga topshirilgani bilan qutladi. 

Takidlanganidek, tarixi bir necha ming yillarga tutash qadim SHofirkon zamini azaldan o'zining olimlari, shoir va adiblari bilan nom qozongan. O'z davrida yuksak tamaddun maktabini yaratgan, O'rta Osiyo shahar davlatchiligining ilk namunalaridan biri hisoblangan ko'hna Vardonze qalasini yosh avlodga ming yillik moziy sirlaridan hikoya so'zlovchi boqiy muallim, desak mubolag'a bo'lmaydi. 

– Prezidentimizning o'tgan yil viloyatimizga tashrifi chog'ida, SHofirkonda ham bo'lib, ushbu tumanni rivojlantirish borasidagi tashabbuslari hudud tarixining yangi bosqichiga asos soldi, – deydi Botir Zaripov. – Bundan tashqari, nisbatan qisqa davr ichida “Azteks” singari o'nlab sanoat korxonalari ishga tushirildi. Qazilma konlarni o'zlashtirish, bog'dorchilik va tumanning faqatgina o'ziga xos bo'lgan imkoniyatlardan unumli foydalanish bo'yicha maqsadli dasturlar qabul qilindi. Aynan ushbu tashrif sharofati natijasida tumanda Buxoro neftni qayta ishlash zavodi tomonidan zamonaviy bolalar oromgohi qurilishi jarayonlari olib borilmoqda. 

Ushbu imkoniyatlar samarasini esa bugun foydalanishga topshirilayotgan muhtasham va go'zal o'yingoh misolida ham ko'rish mumkin. 1966 yilda foydalanishga topshirilgan mazkur o'yingoh o'tgan 60 yillikdan ortiq vaqt davomida biror marta tamirlanmagan. O'tgan yili tuman aholisi bilan uchrashganimda bir guruh faollar o'z vaqtida gavjum bo'lgan stadionni tamirlab, yoshlarimizning sport bilan shug'ullanishlariga sharoit yaratishni iltimos qilishgan edi. Qisqa vaqt ichida tuman hokimligi, qolaversa 3-sektor rahbariyati say-harakatlari bilan siz ko'rib turgan fayzli stadion barpo etildi. 

Aytish joizki, o'yingohning aynan shu kunlarda foydalanishga topshirilishining ham ramziy manosi bor. Negaki, kuni kecha Prezidentimiz tomonidan o'tkazilgan videoselektor yig'ilishida aholini ommaviy sportga jalb etish hamda ularning jismoniy tarbiya bilan shug'ullanishlari uchun zarur shart-sharoitlar yaratish borasida topshiriqlar berilgan edi. 

Foydalanishga topshirilayotgan ushbu sport majmuasi yoshlarning nafaqat professional sport bilan shug'ullanishlari, balki aholini sog'lom turmush tarziga jalb etishda ham muhim maskan bo'lib xizmat qiladi.