SHohjahon raqib nima uchun o'zgarganiga izoh berdi

CHarm qo'lqop ustamiz saytimizga bergan intervyusida nima uchun ushbu kutilmagan o'zgarish amalga oshganiga izoh berdi.

- Voqealar rivoji bunday keskin o'zgarib ketishini kutmagandik. Menejer va promouterlarim uchun ham bu kutilmagan syurpriz bo'ldi. Afsuski, jangga oz muddat qolganida raqibim betob bo'lib qoldi. 

Natijada Danielito Zorrillaning jamoasi Moskvaga kelmaslikka qaror qildi. Biz zudlik bilan boshqa raqib izladik va Maksim CHurbanov variantida to'xtaldik. Bunday qisqa vaqtda kuchli raqib topishning imkoni yo'q edi. 

Eng yomoni shundaki, jang uchun chiqarilgan chiptalar allaqachon sotib bo'lingandi. Ringga chiqmasligimning imkoni yo'q edi. Nasib qilsa, ertaga chiroyli g'alabam bilan muxlislarni xushnud etaman. Bo'lib o'tgan ko'ngilsiz holat uchun barchadan uzr so'rayman, - dedi Ergashev. 

Eslatib o'tamiz, SHohjahonning yangi raqibi 32 yoshli Maksim CHurbanov rossiyalik bokschi bo'lib, faoliyati davomida jami 13 ta jang o'tkazgan. Hisobida 8 g'alaba, 4 mag'lubiyat va bir durang bor. Bir marotaba nokautga uchragan.