“Sog'lom avlod uchun” kubogi xovoslik yoshlarga nasib etdi

“Nafosat olami” shiori ostida o'tkazilgan mazkur festivalda viloyatning 3 shahar va 8 tumanidan sportning badiiy gimnastika hamda suzish turlari bilan muntazam shug'ullanib kelayotgan yigit-qizlardan tashkil topgan 11 jamoa bahslarda ishtirok etdi.

Badiiy gimnastika turi bo'yicha jami 74 nafar qizlar o'zlarining mahoratlarini namoyish etgan bo'lsa, 100 dan ziyod erkaklar suzish bahslarida ishtirok etdi.

Umum jamoa hisobida Xovos tumani terma jamoasi 1-o'rinni egalladi. 2- va 3-o'rinlarni esa mos ravishda Guliston va Yangier shahri jamoalariga qo'lga kiritdi.

– Aholining, ayniqsa, yoshlarning bo'sh vaqtini mazmunli o'tkazish, ularni sportga kengroq jalb etish, sog'lom turmush tarzini qaror toptirishda mazkur festivalning o'z o'rni bor, – deydi “Sog'lom avlod uchun” xalqaro xayriya fondi viloyat filiali rahbari YU.Usmonova. – Ajabmas, shu bahslarda ishtirok etgan sportchilar xalqaro arenalarda yurt bayrog'ini baland ko'tarsa.

Festival so'ngida g'olib va sovrindorlar tashkilotchilarning diplom va esdalik sovg'alari bilan taqdirlandi.