Suchjou CHellenjeri: Humoyun Sultonov bir kunda ikkita o'yin o'tkazib, musobaqa asosiy davrasiga yo'l oldi

Musobaqa saralashida o'zbekistonlik ikki nafar raketka ustasi — Humoyun Sultonov hamda Sergey Fomin ham chiqish qildi.

Mamlakatimizning birinchi raqamli tennischisi bo'lmish Sultonov bugunning o'zida ikkita o'yinda kortga chiqdi. U dastlab, reytingdan o'rin olmagan xitoylik CHjuruy CHjangni 2:0 (6/1, 6/2) hisobida dog'da qoldirdi. O'yin 1 soat, 9 daqiqa davom etdi. Kvalifikaciya davrasida birinchi raqamli tennischi sifatida tasniflangan Humoyun hal qiluvchi bahsda Yaponiya vakili Yuta Kikuchidan ustun keldi — 2:0 (6/2, 6/4). Malumot o'rnida, ushbu o'yin oldidan Sultonov ATP reytingida 395, Kikuchi esa 615-o'rinni egallab turgandi.

Endi Humoyun ertaga Suchjou CHellenjerining ilk bosqichi doirasida Xitoy Taypeyi sharafini himoya qiluvchi Vu Ting Lin (ATP-529) bilan to'qnash keladi. O'yin ertaga 7:00 da boshlanishi belgilangan.

SHuningdek, bugun O'zbekistonning ikkinchi raqamli tennis ustasi Sergey Fomin (ATP-465) musobaqa saralashida yaponiyalik Yukuse Takaxashiga qarshi kortga chiqdi va 1:2 (5/7, 6/3, 4/6) hisobida imkoniyatni boy berib qo'ydi. Biroq dunyo reytingida 440-o'rinni band etib turgan Takaxashi musobaqadagi ishtirokini davom ettira olmasligi malum bo'lganidan keyin yo'llanma Fominga nasib etdi.

Sergey ertaga ilk davrada boshqa bir yapon raketkasi — Renta Tokuda (ATP-327) bilan to'qnash keladi.