Sultonov Manishdan o'tgan haftadagi mag'lubiyat uchun revansh oldi

Mukofot jamg'armasi 15 000 dollarni tashkil etuvchi ushbu turnirda hamyurtimiz Humoyun Sultonov ham o'z imkoniyatini sinovdan o'tkazyapti. Mamlakatimizning birinchi raketkasi juftlikdagi ishtirokini g'alaba bilan boshlagan edi. 

Biroz avval u yakkalikning ilk davrasida kortga chiqdi. CHandigarh turnirida birinchi raqam ostida tasniflangan Sultonov 1/16 finalda hindistonlik Manish Sureshkumarni ortiqcha qiyinchiliksiz mag'lubiyatga uchratdi - 6/2, 6/3. Sultonov 74 daqiqa davom etgan uchrashuvda 5, Sureshkumar esa 4 ta eys zarbasini amalga oshirdi.   

Taqqoslash uchun, Humoyun ATP reytingida 331, Manish esa 877-pog'onadan joy olgan. Qizig'i, tennischilar o'tgan hafta Nyu-Delidagi turnirning birinchi bosqichida ham o'zaro to'qnash kelishgandi. O'shanda Sultonov reytingda o'zidan 548 pog'ona quyida borayotgan Sureshkumarga 6/4, 5/7, 4/6 hisobida yutqazib qo'ygandi.