Termiz OZKda ham sportchilar kasbiy imtihonlar bo'yicha saralanayapti

Xabaringiz bor, shu kunlarda mamlakatimizdagi barcha Olimpiya zaxiralari kollejlarida (sobiq ixtisoslashtirilgan Olimpiya zaxiralari maktab-internatlari) 2020/2021 o'quv yili uchun kasbiy (ijodiy) imtihonlar bo'lib o'tmoqda.

Jumladan, Termiz shahar olimpiya zaxiralari kollejida ham bu yilgi imtihonlar har doimgidan farqli o'tkazilmoqda. Avvalo, bu erda 2020/2021 o'quv yili uchun qabul imtihonlarini yuqori saviyada tashkil etish bo'yicha barcha zarur choralar ko'rilganligini qayd etish zarur.

Imtihonlar bo'ladigan barcha sekciya va sport maydonlari to'liq dizenfikciya qilinmoqda. Qolaversa, imtihon vaqtida ham dizenfikciya ishlari davom ettirilayapti. Imtihonlarni esa malakali mutaxassislar kuzatib, baholab borishadi. Oliy maqsad – imtihonlarni halol va shaffof o'tkazib, ilm dargohiga eng istedodli, qaysiki kelgusida jahon arenalarida Vatanimiz bayrog'ini yuqori ko'tarishga qodir yoshlarni saralab olishdir.

Imtihonlar vaqtida yuzaga keladigan turli xil muammolarning oldini olish hamda kasbiy (ijodiy) imtihonlarni yuqori saviyada o'tkazish maqsadida imtihon jarayonlari to'liq videoga yozib olinishi ham tashkil etiladi. Imtihon bo'ladigan maskanlar to'liq shay holatga keltirib qo'yilgan.

Joriy yil Termiz shahar Olimpiya zaxiralari kollejiga 198 nafar o'quvchi hujjat topshirgan bo'lib, ulardan 110 nafari kollejga qabul qilinadi. O'quv dargohiga 15 ta Olimpiya va ikkita milliy sport turlari yo'nalishlariga qabul elon qilingan bo'lib, boks, dzyudo, erkin va yunon-rum kurashi, taekvando VTF, suzish va albatta futbol yo'nalishlarida raqobat ancha yuqori.