To'lqin Qilichev: “Hasan ham, SHahram ham raqibidan kuchli edi”

Afsuski, oltin medal uchun asosiy davogar bo'lgan charm qo'lqop ustalarimiz - Rio Olimpiadasi chempioni Hasanboy Do'smatov va Olimpiadaning kumush medali sovrindori SHahram G'iyosov bugungi final janglarida ringga ko'tarilishmaydi.

Murabbiylar shtabi o'zaro muhokamadan so'ng shunday qarorga kelgan.

“Bu jangdan qochish emas. Har ikki bokschimiz ham raqiblaridan sezilarli darajada ustunlar. Biz aslida Tailandga uch raundlik janglar uchun kelgandik.

Sababi, bokschilarimiz “Uzbek Tigers” jamoasi tarkibida 5 raundlik janglarda ringga chiqishgandi. May oyida Toshkentda Osiyo chempionati o'tkaziladi.

Xabaringiz bor, havaskorlar o'rtasidagi barcha musobaqalar 3 raunddan iborat bo'ladi. SHunga qayta moslashish maqsadida Bangkokdagi turnirda ishtirok etyapmiz. Murabbiylar nima ish qilishayotganini yaxshi bilishadi. Bokschilarimiz kuchli ekanliklarini Osiyo chempionatida yana bir bor isbotlashadi”, - dedi terma jamoamiz murabbiyi To'lqin Qilichev.