Toshkent professional boks oqshomiga mezbonlik qiladi: bugun ushbu shouga bag'ishlangan matbuot anjumani tashkil etildi + FOTO

O'sha kuni poytaxtimizdagi "Humo Arena"da professional boks oqshomi tashkil etiladi. Kechaning markaziy jangida ikki yo'nalishda jahon chempioni Murodjon Ahmadaliev o'ziga tegishli WBA/IBF kamarini yaponiyalik davogar Ryosuke Ivasadan himoya qiladi. Bundan tashqari jang oqshomi doirasida Hasanboy Do'smatov, Isroil Madrimov, Bahodir Jalolov, Elnur Abduraimov, Sanjar Tursunov, Iqboljon Xoldorov hamda Mirazizbek Mirzahalilov kabi bokschilarimiz ham ringga ko'tarilishi kutilmoqda.

Bugun O'zbekiston Milliy olimpiya qo'mitasi binosida ushbu tadbirga bag'ishlangan matbuot anjumani tashkil etildi. Unda O'zbekiston Milliy olimpiya qo'mitasi hamda O'zbekiston boks federaciyasi mutasaddilari, ommaviy axborot vositalari xodimlari ishtirok etishdi. 

"Yaqinda mamlakatimizda dzyudo bo'yicha "Katta Dubulg'a" turkumiga kiruvchi nufuzli musobaqani yuqori saviyada o'tkazdik. Buni Xalqaro dzyudo federaciyasi mutasaddilari ham alohida etirof etishdi. Endilikda biz professional boks kechasini tashkil etmoqchimiz. Rahbariyat tomonidan mana shunday sport tadbirlari orqali yurtimizda sport ommaviyligini yanada oshirish talabi qo'yilgan. MOQning maqsadlaridan biri aholini sportga qiziqtirish, yoshlarni sportga jalb qilishdan iboratdir. SHularni inobatga olgan holda bokschimiz Murodjon Ahmadalievning himoya jangini O'zbekistonda o'tkazish borasida kelishuvga erishdik", - dedi MOQ bosh kotibi Oybek Kasimov.

"Bu kun o'zbek sporti tarixiga alohida qayd etiladi. CHunki mamlakatimiz hali bu darajadagi professional boks oqshomiga mezbonlik qilmagan. Ishonamizki, yurtimiz jahonga mashhur "Matchroom Boxing" promouterlik kompaniyasi bilan tashkil etilayotgan ushbu shouni yuqori saviyada o'tkazadi", - dedi tadbir avvalida O'zbekiston boks federaciyasi bosh kotibi Murodjon Mamadaliev.

Anjuman davomida OAV xodimlari o'zlarini qiziqtirgan bir qator savollarga javob olishdi. 

Arenaga kirish va translyaciya

"Pandemiya hali yakuniga etmaganligini hisobga olib, 12 ming kishini o'z bag'riga sig'dira oladigan "Humo Arena"ga 6 ming nafargacha muxlis kiritiladi. Bu borada Sog'liqni saqlash vazirligi bilan birga ham ish olib borilmoqda.

Translyaciya? Hozirda jang oqshomini O'zbekistonda namoyish etish bo'yicha "Sport" hamda "Zo'r TV" telekanali bilan muzokaralar olib borilmoqda. Bu borada yakuniy qarorga kelingach, elon qilinadi", - dedi MOQ departament direktori Alisher Karimov.

Miraziz Mirzahalilov ham professional shartnoma imzoladimi?

"Bokschilarimizning aksariyat qismi "Mir Boksa" kompaniyasi bilan hamkorlik qiladi. Qolganlar qatori Miraziz ham ushbu kompaniya bilan muzokaralar o'tkazmoqda. Jangga yaqin bu bo'yicha ishlar yakuniga etkaziladi".

Jang oqshomiga martabali mehmonlar taklif qilingan. Toshkentda Ijroqo'm yig'ilishi bo'lib o'tadi

Mazkur jang oqshomiga AIBA prezidenti Umar Kremlyov, Osiyo boks konfederaciyasi Anas Otaiba boshchiligidagi delegaciya vakillari kelishadi. Yana qo'shimcha malumot sifatida shuni aytishimiz mumkinki, ushbu tashrif doirasida Toshkentda Osiyo boks konfederaciyasining Ijroqo'm yig'ilishi ham tashkil etiladi. Yaxshi bilasiz, O'zbekiston boks federaciyasi raisining birinchi o'rinbosari Saken Djetibaevich Polatov mazkur Ijroqo'm azosi, shuningdek Osiyoda boksni rivojlantirishni qo'llab-quvvatlash jamg'armasi rahbari hisoblanadilar", - dedi O'zbekiston boks federaciyasi xalqaro aloqalar bo'limi boshlig'i Mirshohid Tillaboev.

Anjuman davomida jurnalistlar o'zlarini qiziqtirgan ko'plab savollarga javob olishdi. 

O'zbekiston boks federaciyasi matbuot xizmati