Uchtepa tumani 2-sonli BO'SM faoliyatiga nazar FOTOREPORTAJ

Hozirgi kunda bolalar-o'smirlar sport maktabida 11ta olimpiya (badiiy gimnastika, boks, taekvondo VTF, tennis, engil atletika, og'ir atletika, baydarka va kanoeda eshkak eshish, akademik eshkak eshish, badminton, futbol, kamondan otish) hamda ikkita milliy (belbog'li kurash, Turon jang sanati) sport turlari bo'yicha to'garaklar faoliyat yuritmoqda.

Sport turlari bo'yicha murabbiylar soni 28 nafar bo'lib, shundan sport ustasi – 11 nafar, oliy toifali murabbiy – 3 nafar, 1-toifali murabbiy – 12 nafar hamda 2-toifali ikki nafar trener-murabbiylar shug'ullanuvchilarga saboq berib kelishyapti.

Sport turlari bo'yicha 53 ta guruhda hozirgi kunda 530 nafar sportchi shug'ullanib kelmoqda.

Uchtepa tumani 2-sonli bolalar-o'smirlar sport maktabi tuman jismoniy tarbiya va sport bo'limi, Xotin-qizlar qo'mitasi, Mahalla xayriya jamg'armasi, Xalq talimi bo'limi, Maktabgacha talim bo'limlari bilan hamkorlikda ommaviy jismoniy tarbiya va sport tadbirlarini tashkil etib kelmoqda.

BO'SM shug'ullanuvchilaridan 2018 yilda 46 nafari, 2019 yilda 30 nafari, 2020 yilda 31 nafari sport turlari bo'yicha O'zbekiston terma jamoalarining asosiy va zaxira tarkibiga kiritilgan.

Har yili O'zbekiston chempionati va kuboklarida yuzdan ortiq sportchi g'olib va sovrindorlar safidan joy olib kelmoqda. Misol tariqasida, BO'SM tarbiyalanuvchilari 2019 yilning o'zida sport turlari bo'yicha O'zbekiston chempionatlarida 33ta oltin, 42ta kumush hamda 56ta bronza medallarini qo'lga kiritishdi.

Hozirda Uchtepa tumani 2-sonli bolalar-o'smirlar sport maktabida yangi suv havzasi barpo etilgan bo'lib, yaqin kunlarda o'z faoliyatini boshlaydi.

Ushbu suv havzasida suzish, suv polosi, sinxron suzish kabi sport turlari bo'yicha tayyorgarlik olib borilmoqda. Suzish bo'yicha malakali trener-murabbiylar ishga jalb qilinib, 200ga yaqin bolalarni suv sporti turlariga qabul qilish rejalashtirilgan.

Sport maktabi tarbiyalanuvchilari xalqaro musobaqalarda ham yurtimiz sharafini munosib himoya qilib kelmoqda. Jumladan, ular tomonidan xalqaro sport arenalarida 9ta oltin, 4ta kumush hamda 11ta bronza medallari qo'lga kiritilgan.

Hozirgi kunga kelib BO'SM tarbiyalanuvchilari orasidan badiiy gimnastika, boks, taekvondo VTF, kamondan otish, baydarka va kanoeda eshkak eshish, akademik eshkak eshish, belbog'li kurash hamda "Turon" sport turlari bo'yicha g'olib va sovrindorlar etishib chiqmoqda. Ishonamizki, mazkur sport maktabi tarbiyalanuvchilari orasidan yaqin yillarda olimpiada chempionlari ham etishib chiqadi.