UFC Fight Night 278 bonus sohiblari malum. Guskovning ehtimoliy raqibi ham 100 000 dollarlik chek oldi

Mag'lubiyat nimaligini bilmay kelayotgan polshalik yarim og'ir vazn toifasi vakili Ivo Baranevskiy ham bugungi yorqin g'alabasi uchun bonusga loyiq ko'rildi. U jangning 85-soniyasidayoq Yangi Zelandiya vakili Junior Tafani texnik nokautga uchratgan edi. Ikki lou-kik zarbasidan keyin referi Den Miragliott jangni to'xtatishga majbur bo'ldi. Ivo bugungi g'alabasi uchun 100 ming dollar miqdoridagi bonusga ega chiqdi. 

"Oqshom chiqishi" uchun mo'ljallangan ikkinchi bonus o'ta engil vazn toifasi vakili meksikalik Edgar CHayrezga nasib etdi. U Bruno Silvani apperkot zarbasi bilan nokdaun holatiga tushirdi va keyin ortdan bo'g'ish usulida braziliyalik raqibini taslim qildi. 

"Oqshomning eng yaxshi jangi" sifatida amerikalik o'rta vazn toifasi vakillari Brendan Allen va Edmen SHaxbazyan o'rtasidagi to'qnashuv tan olindi. Har ikki jangchi ham uch raundlik olovli jang uchun 100 ming dollardan bonusga ega bo'ldi. Ushbu jangda Allen hakamlarning qaroriga ko'ra g'alaba qozondi.

Raqiblarini muddatidan avval mag'lubiyatga uchratgan Brays Mitchell, Alessandro Kosta, CHelsi CHendler, Joanderson Brito va Ketlin Souza esa qo'shimcha 25 000 dollar miqdoridagi bonusni qo'lga kiritdi.