Ulan-Batorda milliy sportimiz kurash bo'yicha jahon chempionati o'tkaziladi

Milliy sport turimiz kurash bo'yicha o'tkazilib kelinayotgan jahon chempionatlari dunyodagi ming-minglab kurash ixlosmandlarining diqqatini tortishi bilan birga, azaliy qadriyatlarimizning xalqaro maydondagi yorqin tantanasi bo'lib bo'y ko'rsataveradi.

Yana bir haftadan keyin Mo'g'uliston poytaxti Ulan-Bator shahrida boshlanadigan o'smirlar o'rtasidagi IX jahon chempionati hamda faxriylar o'rtasidagi III-jahon chempionati ham kurashning dunyo sport maydonidagi ommaviyligini taminlashga xizmat qilishi bilan qadrli.   

Xalqaro kurash associaciyasi kuni kecha mazkur jahon chempionatida ishtirok etadigan milliy terma jamoalarni ro'yxatga olish muddati yakunlanganini elon qildi.  

Xalqaro kurash associaciyasiga yo'llangan talabnomalarga ko'ra, Mo'g'uliston poytaxtida o'tadigan jahon chempionatida 30 dan ziyod davlatning 400 nafardan ortiq sportchilari bellashuvlarda ishtirok etadi.   

Mazkur jahon chempionati doirasida Ulan-Batorda kurashni yanada rivojlantirish maqsadida murabbiy va hakamlar uchun seminarlar, Xalqaro kurash associaciyasining bir qator kengaytirilgan yig'ilishlari, turli brifing va ko'rgazmalar tashkil etilishi belgilangan.   

Jahon chempionati nizomiga muvofiq, joriy yil 2 dekabrdan bellashuvlarga start beriladi. Ayni kunlarda Mo'g'ulistonda o'tadigan kurash musobaqalarini yuqori saviyada tashkil etish borasida Ulan-Batorda Xalqaro kurash associaciyasining ishchi guruhi o'z faoliyatini olib bormoqda.   

Eslatib o'tamiz, ushbu jahon chempionatida vatanimiz sharafini himoya qilishga hozirlanayotgan kurash bo'yicha O'zbekiston milliy terma jamoasi azolari, murabbiylar Toshkent viloyatida o'tkazilayotgan o'quv-mashg'ulot yig'inlarida ishtirok etmoqda.