Umrining qolgan qismini qamoqda o'tkazishi mumkin bo'lgan sobiq UFC chempionining ishi bo'yicha tafsilotlar

So'nggi 12 soat ichida bir necha UFC jangchilari ijtimoiy tarmoqlar orqali sobiq chempionni qo'llab-quvvatlashlarini bildirishdi. Ular orasida Xabib Nurmagomedov, Islam Maxachev, Israel Adesanya va boshqa jangchilarni ko'rish mumkin. Nima uchun butun dunyo aralash yakkakurashlari ustalari 39 yoshli faxriyni himoya qilishmoqda?

2022 yil fevral oyining oxirida Velaskes qotillikka urinish aybi bilan Santa-Klara (Kaliforniya) policiyasi tomonidan qo'lga olindi. Kuni kecha sud majlisi bo'lib o'tdi va unda voqea tafsilotlari malum qilindi.

Santa-Klara prokurori ofisining ESPNga xabar qilishicha, Keynga 10 ta ayblov qo'yildi: qotillikka urinish, mashinadagi odamlarga o'q uzish, qurol bilan hujum qilgani uchun uchta ayblov, halokat darajasi yuqori bo'lgan qurol bilan hujum qilgani uchun yana uchta ayblov, transport vositasiga quroldan ataylab o'q uzish va jinoyat sodir etish maqsadida o'qlangan qurol olib yurish.

Agar sud Velaskesni o'nta ayblovning beshtasi bo'yicha ham aybdor deb topsa, sobiq chempion 20 yil umrini qamoqda o'tkazishiga to'g'ri keladi. SHu o'rinda eslatib o'tish kerak, Kaliforniya shtatida o'lim jazosi mavjud va bu Keynga ham xavf solishi mumkin. Ko'rib turganingizdek, vaziyat juda qaltis. Xo'sh, sobiq chempionning bunday yo'l tutishiga nima sabab bo'ldi?

Prokuraturaning malum qilishicha, Velaskes o'z farzandiga nopok munosabatda bo'lgan 43 yoshli Garri Gulartening avtomobiliga 40-kalibrli qurolidan o'q uzgan. Middleeasy axborot manbasi xabariga ko'ra, yaqin qarindosh deyilayotgan shaxs bu - Keynning qizi edi. Velaskesning 13 yoshli qizi va 4 yoshli o'g'li bor. Chevy Silverado rusumidagi avtomobilda Gularte bilan birga uning ota-onasi ham bo'lgan. Velaskes avtomobilga o'zining Ford rusumli pikapi bilan zarba bergan.

Otishma natijasida Velaskes nishonga olgan Gularte emas, uning otasi yaralangan. SHifokorlar jarohat 63 yoshli shaxsning hayotiga jiddiy xavf tug'dirmasligini takidlashmoqda. SHuningdek, policiyada Gularte bilan bog'liq ayblovlar ham bor edi. 23 fevral kuni Gularte Keynning farzandi bilan nomaqbul munosabatda bo'lganlikda gumon qilindi. Jabrlanuvchi so'roq qilindi. Policiyaning aytishicha, Gularte Velaskesning farzandiga bir necha bor shunday munosabatda bo'lgan.

SHerif idorasining xabar berishicha, Gularte voyaga etmagan bolaga nisbatan bir necha marta tajovuzda ayblanib, Santa-Klara okrugida qamoqqa olingan. U 25 fevral kuni Santa-Klara okrugi Oliy sudida aybdor deb topildi, ammo tuman prokurorining etirozlari tufayli 50 000 $ garov puli evaziga ozod qilindi. Bu qarordan so'ng Velaskes adolatni o'z qo'liga olishga kirishdi.

Tuman prokurori birinchi sud majlisidan keyin juda vazmin va extiyotkor izoh berdi:

"Fojia shundaki, janob Velaskes adolatni o'z qo'liga olishga qaror qilib, jamoatchilik va mashinadagilarni xavf ostiga qo'ydi. Bu zo'ravonlik uning oilasiga yanada ko'proq azob-uqubatlarni keltirib chiqaradi".

Og'ir vaznda Bellatorning amaldagi chempioni Rayan Beyder Velaskes hayotdagi eng hurmatga sazovor inson ekanligini aytdi.

"Bu xabarni birinchi bor eshitganimda, bu erda ko'proq narsa bor deb o'yladim. Keyn bilan uzoq vaqtdan beri tanishman va u qo'rqinchli ko'rinishiga qaramasdan, sayyoramizdagi eng yaxshi, eng g'amxo'r yigitlardan biri, u haqiqiy oilaparvar. U o'zini boshqacha tuta oladimi? Siz qanday munosabatda bo'lar edingiz", - deya takidlagan Beyder.

Eng asosiysi, sobiq chempionni amerikalik hamkasblari ham himoya qilmoqda: "Farzandingizni zo'rlagan odamni otishingiz taqiqlangan davlatda yashay olmayman. #FreeCain".