Usik: "Joshua menga qarshi nima qilishi haqida umuman o'ylamayman"

Superog'ir vazn toifasida WBA, WBO va IBF yo'nalishlari bo'yicha jahon chempioni Aleksandr Usik Entoni Joshua ustidan qozonilgan g'alaba haqidagi fikrlari bilan o'rtoqlashdi. Ukrainalik bokschining so'zlariga ko'ra, u jamoasi bilan birga jangni tahlil qilish uchun ko'p mehnat qilgan.

"Bu jangni 8 yoki 9 bor qayta ko'rib chiqqanman. Har ko'rganimda men ko'p yillik kundaligimga xatolarimni yozib qo'yardim. To'g'ri qilgan ishlarimni yozmaganman. Hozir bu ancha zo'r, qiyin jang bo'lganini eslayman. Xudoga shukur, men g'alaba qozonganman".

Aleksandr nima sababdan yaxshi vaziyatlaridan ko'ra xatolariga ko'proq etibor berganini tushuntirdi.

"Jangni murabbiy alohida, men alohida kuzatdik. Keyin esa birga kuzatdik va xatolarimizni muhokama qildik. Ijobiy taraflarni qoldirib, xatolarimizni xotiradan o'chirishimiz kerak. Murabbiy va jamoam bilan birga jangni, nimalarga erishganimizni tahlil qildik, lekin ko'proq nimalarga erisha olmaganimizni muhokama qildik".

Usik Joshua bilan revansh jangidan nimalar kutayotganini aytdi.

"Revansh jangida biz yangi ishlar qilamiz, lekin yaxshi ishlarni ham takrorlaymiz. Joshua nima qilishini bilmayman. Raqibim menga qarshi nima qilishi haqida umuman o'ylamayman.

Maqsadim — zaldagi mashg'ulotimni o'z jamoam bilan bajarish. Buni jangda ko'rsatish kerak. Raqib ringda men ruxsat berganimnigina qiladi. Bu nafaqat men, balki har bir raqib o'ziga ruxsat berilgan ishni qiladi", - dedi Usik Tipsportga bergan intervyusida.

Bokschilar o'rtasidagi revansh jangi shu yil yoz faslida bo'lib o'tishi mumkin. Avvalroq, Usikning menejeri jangning ehtimoliy manzilini aytgandi.