Velosport. "Tashkent City" klubi Avstraliyadagi "Tour Down Under" Jahon kubogi bosqichining ilk raundini qanday o'tkazdi? (To'liq natijalar)

Ayollar o'rtasidagi bellashuvlarda dunyoning eng kuchli 16 ta jamoasi ishtirok etmoqda. Quvonarlisi, ushbu 16 ta jamoa orasida O'zbekistonning "Tashkent City" klubi ham bor.

Sportchilar musobaqaning ilk kuni va ilk bosqichi doirasida Handorfdan Kempbelltaungacha bo'lgan 93,9 km masofani bosib o'tdi.

Musobaqada Avstraliyaning "AG Insurance - Soudal Team" klubi azosi Alli Uollaston 2 soat, 32 daqiqa va 27 soniya bilan g'alaba qozondi. Ikkinchi o'rin esa kengurular yurtining boshqa bir klubi - "Liv Alula Jayco" azosi, marraga Uollastondan ikki daqiqa kech kelgan Jorjiya Beykerga nasib etdi. Alli Uollastondan 6 daqiqa fark bilan marraga kelgan BAAning "UAE Team ADQ" jamoasi azosi, asli italiyalik Sofiya Bertizolla musobaqaning ilk bosqichida uchinchi natijani qayd etdi.

Bahslarda ishtirok etgan hamyurtlarimizdan Yanina Kuskova, Olga Zabelinskaya va Margarita Misyurina marraga g'olibdan 10 daqiqa kech etib keldi. 

"Tashkent City" klubi vakillarining "Tour Down Under" Jahon kubogi bosqichining ilk raundida qayd etgan natijalari:

36. Yanina Kuskova (2 soat, 42 daqiqa)

38. Olga Zabelinskaya (2 soat, 42 daqiqa)

48. Margarita Misyurina (2 soat, 42 daqiqa)

67. Madina Qahhorova (2 soat, 52 daqiqa)

89. Nafosat Qozieva (3 soat, 40 daqiqa)

93. Sofiya Karimova (3 soat, 42 daqiqa).

"Yosh velosportchi" klassifikaciyasida hamyurtimiz Margarita Misyurina 9-natijani qayd etdi. Jamoaviy reytingda esa "Tashkent City" klubi ilk bosqichda 11-o'rinni band etdi.

Bugun musobaqaning ikkinchi bosqichi doirasida sportchilar Glenelg shahridan Stirlinggacha 104,2 km masofada bahs olib boradi.