Velosportchilarimiz jahon chempionatida qanday ishtirok etmoqda?

Kecha trek ustalari o'z chiqishlarini yakunlashdi.

Mazkur yo'nalishda Margarita Misyurina hamda Nafosat Kozieva yurtimiz sharafini himoya qilishdi. Kozieva ochkolar poygasida 14, “elimination” dasturida esa 18-natijani qayd etdi. Har ikki sportchimiz juftlikda madison dasturida medallar uchun kurash olib borishdi. Biroq bellashuv davomida omadsizlik sabab finishga etib kela olishmadi.

SHotlandiya trassalari bo'ylab ketayotgan shossedagi poygalar ham qizg'in tus olmoqda. Dmitriy Bocharov, Aleksey Fomovskiy, Murodjon Xolmurodov, Sofiya Karimova, Yanina Kuskova hamda Olga Zabelinskaya aralash jamoaviy dasturda qatnashdilar. Mazkur yo'nalishda sportchilarimiz 13-natijani qayd etishdi.

Erkaklar o'rtasida 271.1 km masofaga kechgan guruh poygasi bahsi sportchilarning irodasini yana bir bor sinab berdi. Unda 195 nafar atlet startga chiqdi. 6 soatdan oshiq davom etgan poygada 51 nafar ishtirokchigina finishga etib kela oldi. Afsuski, Murodjon Xolmurodov poyga davomida kurashdan chiqdi.

13-avgust kuni kechadigan ayollar o'rtasidagi guruh poygasida Olga Zabelinskaya va boshqa vakillarimiz ham ishtirok etishi kutilmoqda. Hamyurtlarimiz 154.1 km masofaga mo'ljallangan ushbu poygada medallar qatori Parij-2024 Olimpiadasi yo'llanmasi uchun startga chiqishadi.