Vitaliy Klichko ukasi haqida: "Hozir u zo'r sport formada"

"O'ylashimcha, u hech kimga nimanidir isbotlashi shartmas. U boks tarixiga eng kuchli bokschi sifatida kirgan. Faoliyatini qayta tiklash masalasini faqatgina o'zi hal qiladi. Lekin, hayotda asosiysi pul emas, balki sog'liq ekanligini unutmasligi lozim. Vladimir qanday qaror qabul qilsa ham, men uni doimgidek qo'llab turaman".

"Ukangiz pul uchun qaytmoqdami?" degan savolga Klichkolarning kattasi quyidagicha javob qaytardi:

"O'ylashimcha Vladimirga pul muhim emas, sababi u faoliyati davomida ko'p pul ishlab topdi. Faoliyatini yakunlaganidan so'ng ham biznesda yaxshi faoliyat olib bormoqda".

SHuningdek, Vitaliy DAZN Vladimirga shartnoma taklif qilgandan so'ng nima haqida gaplashganini ham aytdi.

"DAZN Vladimirga 40 million dollarlik shartnoma taklif qilganidan so'ng men unga qo'ngiroq qildim. O'shanda ukam bu shartnoma menga umuman qiziq emas degandi. Keyin DAZN 80 millionlik shartnoma taklif qilganda yana gaplashdik. Bu taklif ham qiziq emas, balki 100 millionlik shartnoma taklif qilishsa o'ylab ko'rardim degandi".

Vitaliy Klichko ukasining hozirgi sport formasi haqida ham fikr bildirdi.

"Agar u futbolkasini echsa, siz uning qanday ajoyib formada ekanligini ko'rasiz. U har kuni mashg'ulot o'tkazadi. Ajablanarli ko'rinishi mumkin, lekin u ajoyib jismoniy holatini saqlab qolgan", - dedi katta Klichko.