Xalqaro "Olimpiya kuni”ning 127 yilligi muborak!

Bundan roppa-rosa 127 yil avval baron Per de Kuberten boshchiligida Olimpiadani tiklash uchun eng katta qadam qo'yildi, yani 1894 yilning 23 iyun kuni Xalqaro Olimpiya qo'mitasi (XOQ)ga asos solindi. O'shandan beri to shu kungacha ushbu sana Xalqaro "Olimpiya kuni" sifatida nishonlab kelinadi.

Bugungi kunga kelib “Olimpiya kuni” dunyoda eng ommaviy tarzda nishonlanadigan sport bayramlaridan biriga aylangan. Har yili Xalqaro Olimpiya qo'mitasiga azo 205 davlatda o'tkaziladigan sport va salomatlik bayramida millionlab insonlar bevosita ishtirok etishmoqda. Ushbu tadbirni o'tkazishdan ko'zlangan asosiy maqsad – aholi orasida sog'lom turmush tarzi hamda Olimpizm g'oyalarini keng targ'ib etish, katta-yu, kichik qalbida jismoniy tarbiya va sportga bo'lgan mehrni yanada yuksaltirishdan iborat.

Mamlakatimizda aholi o'rtasida sportni ommalashtirish, sog'lom turmush tarzini targ'ib qilish, jahon arenalarida sportchilarimizning munosib ishtirok etib, yuqori marralarni zabt etishi uchun shu kunga qadar Prezidentimizning jismoniy tarbiya va sportni rivojlantirishga oid o'ndan ortiq farmon va qarori, ular asosida Vazirlar Mahkamasining ko'plab qarorlari qabul qilinmoqda.

Kechadan etiboran ushbu sanaga bag'ishlab bir qator federaciyalarimiz tomonidan turli bayram tadbirdari tashkil etilmoqda. Bu esa musobaqalarga chanqoq bo'lib turgan atletlarimizning ruhiyatini oshirishga, ular orasidagi halol raqobatni, sog'lom turmush tarzini yanada rivojlantirishga turtki bo'lmoqda.

Fursatdan foydalanib, sport va sog'lom turmush tarziga befarq bo'lmagan barcha yurtdoshlarimizni Xalqaro “Olimpiya kuni”ning 127 yilligi bilan tabriklaymiz. Sport hamisha hayotingizning ajralmas bo'lagi bo'lib qolsin!