XOQ rahbari: AIBA bilan hozirgi holatda bokschilar jabr chekadi

Ikki kunga mo'ljallangan yig'ilishda havaskor boksning Olimpiya o'yinlari dasturidan chiqarish, Xalqaro havaskor boks associaciyasi (AIBA)ning bugungi faoliyatiga bog'liq muhim masalalar muhokama qilinadi. 

Xalqaro olimpiya qo'mitasi (XOQ) ilk bor AIBAga Braziliyada o'tgan Rio-2016 Olimpiadasidagi noxolis hakamlikdan so'ng jiddiy etiroz bildirgandi. O'shanda XOQ AIBA oldiga xolis hakamlikni yo'lga qo'yish, tashkilotning moliyaviy holatini yaxshilash, dopingga qarshi kurashish kabi talablarni qo'ygan edi. 

Yaqinda esa XOQ prezidenti Tomas Bax AIBAga G'ofur Rahimovning prezidenti etib tayinlanganidan havotirga tushayotganini yashirmagandi. Ikki kunlik yig'ilishda AIBAning yangi hisoboti ko'rib chiqiladi va shundan so'ng boksning Olimpiada dasturida bo'lish yoki chiqarilish masalasiga oydinlik kiritiladi. 

- Biz sportchilarni ayrim rahbarlarning qing'ir ishlari uchun jazolamoqchi emasmiz. Imkon qadar bokschilarning Olimpiya o'yinlaridan chetda qolmasliklari uchun harakat qilamiz, - dedi Xalqaro olimpiya qo'mitasi prezidenti Tomas Bax. 

Eslatib o'tamiz, shu yilning 2-3 noyabr kunlari Moskva shahrida o'tkazilgan Xalqaro havaskor bokschilar associaciyasining hisobot-saylov yig'ilishida o'zbekistonlik G'ofur Rahimov AIBAning yangi prezidenti etib saylangandi.