Xubert Gurkach - Estoril Open chempioni!

Musobaqa bosh sovrini dunyoning 10-raketkasi Xubert Gurkachga nasib etdi. Polshalik tennischi hal qiluvchi final uchrashuvida ATP reytingida 77-pog'onada borgan ispaniyalik Pedro Martinesni mag'lubiyatga uchratdi - 6/3, 6/4.

Tennischilarning o'zaro uchrashuvlaridagi hisob yanada yirikladi - 4:0. Sakson etti daqiqa davom etgan bahsda Gurkach 15 ta eys zarbasi hamda 2 ta breykni amalga oshirgan. Xubert faoliyatida ilk bor grunt qoplamali turnirda chempion bo'ldi. 

Millennium Estoril Open turniridagi muvaffaqiyatli ishtirok unga 250 reyting ochkosi hamda 88,125 evro mukofot puli keltirdi. Bu uning faoliyatidagi sakkizinchi sovrini bo'ldi. Endi unda hamma kort qoplamalardagi chempionlik sovrini bor. 

Bundan tashqari, Xubert Gurkach 1981 yildan beri grunt turnir chempionligini qo'lga kiritgan birinchi polyak tennischiga ham aylandi.