Yana bir UFC turnirining markaziy jangi tasdiqlandi

Yarimo'rta vazn toifasi vakillari - braziliyalik Gilbert Berns va amerikalik SHon Bredi o'rtasidagi to'qnashuv 7 sentyabr kuni o'tkaziladigan UFC turnirining markaziy jangi maqomida bo'ladi. Har ikki aralash yakkakurash ustasi ham ushbu jangga rozilik bergan, faqat shartnomaga imzo qo'yilsa bo'ldi. 

UFC chempionlik kamariga sobiq davogar Gilbert Berns ketma-ket ikkita jangida mag'lubiyatga uchragan. U Belal Muhammadga ochkolar hisobiga ko'ra imkoniyatni boy bergan bo'lsa, Jek Della Maddalenadan nokautga uchragan edi. 

SHon Bredi so'nggi jangida Kelvin Gastelumni uchinchi raundda kimura usuli bilan muddatidan avval taslim etgandi. Undan avval esa professional faoliyatidagi yagona mag'lubiyatini Belal Muhammaddan qabul qilib olgandi. Belal SHonni ikkinchi raundda texnik nokautga uchratgandi.  

Ayni paytda Gilbert Berns hamda SHon Bredi yarimo'rta vazn toifasi UFC reytingida mos ravishda oltinchi va sakkizinchi o'rinlarni egallab turishibdi.