Yo'g'e?! 2032 yilgi Olimpiadada eshkak eshish musobaqalari timsohlar yashaydigan daryoda o'tkazilishi mumkin

2032 yilgi Olimpiada 23 iyuldan 8 avgustgacha Avstraliyaning Brisben va Kvinslend shaharlarida o'tkaziladi.

Kvinslend hukumati eshkak eshish musobaqalarini Rokgempton shahri yaqinidagi Ficroy daryosida o'tkazishni taklif qildi. Bu daryo timsohlar yashaydigan hudud sifatida tanilgan.

Bungacha ushbu joy turli musobaqalar oldidan eshkak eshuvchilarning tayyorgarlik bazasi sifatida foydalanilgan.

"Rokgemptonda eshkak eshish musobaqalari  o'tkazilishini elon qilishdan juda mamnunman. Ularni Sidneyga ko'chirish bo'yicha takliflar bor edi, lekin bu Olimpiada shukuhini bu erda qoldirish uchun ajoyib imkoniyat, biz bu imkoniyatdan foydalanishimiz kerak", — dedi Kvinslend bosh vaziri Devid Krizafulli.

Krokodillarni ko'paytirish bilan shug'ullanadigan ferma egasi Jon Leverning aytishicha, musobaqalar xavfsiz bo'ladi.

"Timsohlar asosan kechqurun faol bo'ladi, musobaqalar esa kunduzi o'tkaziladi. Ular asosan qirg'oqda ov qiladi, poygalar esa chuqur suvda bo'ladi. Daryoga yo'l olganingizda avtobus ostida qolishingiz ehtimoli timsoh hujumiga uchrash ehtimolidan ko'ra yuqori", — dedi u.