Yosh qilichbozimiz Tailanddagi musobaqada birinchi o'rinni egalladi

Unda o'zbekistonlik yosh qilichbozlar sablya yo'nalishida yurtimiz sharafini himoya qilishdi.

O'g'il bolalar o'rtasidagi bellashuvlarda qitamizning 9 mamlakatidan 56 nafar sportchi qatnashdi. O'zbekiston terma jamoasi safida Jaloliddin Dushamboev, SHerzod Mamutov, Bobur Rasulov va Bekzod Olimjonovlar ishtirok etishdi. Quvonarlisi, Jaloliddin Dushamboev musobaqa davomida ikki nafar singapurlik, shuningdek, Gonkong vakilini mag'lub etib, finalgacha etib bordi. Hal qiluvchi bahsda esa iordaniyalik Abdalla Altalani 15:9 hisobida mag'lub etdi va musobaqa g'olibiga aylandi. 

Bahslarda ishtirok etgan boshqa bir sportchimiz SHerzod Mamutov esa Iordaniya, Gonkong kabi mamlakat vakillarini mag'lub etib, yarim finalgacha etib bordi. Final ostonasida kechgan bahsda esa iordaniyalik Abdalla Altalaga mag'lub bo'ldi va bronza medali bilan kifoyalandi.

Qizlar o'rtasidagi bahslarda esa Osiyoning 7 mamlakatidan 40 nafarga yaqin sportchi o'z omadini sinab ko'rdi. O'zbekiston sharafini Zaynab Dayibekova, Gulbonu Esemuratova, Sevila Xudoyberganovalar himoya qilishdi.

Zaynab Dayibekova turnir doirasida Yaponiyaning uch nafar sportchisini mag'lubiyatga uchratib, finalgacha etib bordi. Finalda esa gonkonglik Man Lare Leungga mag'lub bo'ldi va yakunda kumush medal sohibasiga aylandi. Gulbonu Esemuratova esa Tailandning ikki sportchisini mag'lub etdi va yarim finalga chiqdi. Yarim finalda esa gonkonglik Man Lare Leungga yutqazib, bronza medalini qo'lga kiritdi.