Yosh shaxmatchilarimiz jahon chempionatida yaxshi start olishdi

Bu galgi jahon chempionati 8, 10 hamda 12 yoshli shaxmatchilar o'rtasida tashkil etilyapti. Dunyoning 100ga yaqin mamlakatidan istedodli shaxmatchilar ishtirok etayotgan musobaqada O'zbekiston terma jamoasi azolari ham to'liq tarkibda medallar uchun baxs olib borishmoqda.

Tarkibdan aka-uka jahon chempionlari Islombek va Javohir Sindarov, Osiyo chempioni Humoyun Bekmurodov, qizlardan Maftuna Bobomurodova, Yuliya Xegay va Afruza Hamdamovalar joy olishgan.

Hamyurtlarimizdan birgina Humoyun Bekmurodov raqibi bilan durang o'ynadi. Qolgan shaxmatchilarimiz raqiblarini mag'lubiyatga uchratishdi. O'n ikki yoshli shaxmatchilar musobaqasida ikkinchi tartib raqamli ishtirokchi bo'lgan Javohir Sindorov franciyalik Tom Dekuigniereni taslim etdi.

O'n yoshli shaxmatchilar bahsida birinchi raqam ostida tasniflangan Islombek Sindorov qora donalarda o'ynashiga qaramay, shveycariyalik Gavin Veyfeldan ustun keldi.

Qizlarimizdan Yuliya Xegay armanistonlik Xamshik Kochinyanni, Maftuna Bobomurodova yana bir arman shaxmatchisi Tamar Goginyanni, Afruza Hamdamova esa qora donalarda o'ynashiga qaramay, reytingda o'zidan ancha yuqorida turgan turkiyalik Zeren Elif Yildizni mag'lubiyatga uchratdi.