17 мар 11:54
Новости

Теннис

17 ёшли Мирра Андреева BNP Paribas Open чемпиони!

АҚШнинг Индиан-Уэллс шаҳри мезбонлик қилган теннис бўйича WTA 1000 тоифасига кирувчи нуфузли турнир якунига етди.

Ҳал қилувчи финал учрашувида WTA рейтингида 11-поғонани банд этган Мирра Андреева дунёнинг биринчи ракеткаси беларуслик Арина Соболенкога қарши кортга чиқди. Икки соату олти дақиқа давом этган баҳсда 17 ёшли россиялик иқтидор эгаси иродали ғалабага эришди - 2/6, 6/4, 6/3.

Теннисчиларнинг ўзаро учрашувларида ҳам Арина олдинда бормоқда - 4:2. Андреева 6, Соболенко 1 та эйс зарбасини амалга оширган. Қўшхатолар ва брейклар бўйича ҳам устунлик мос равишда 2 га 1 ҳамда 4 га 3 кўринишида Мирра фойдасига бўлди.

Шу тариқа, Мирра Андреева кетма-кет иккинчи бор WTA 1000 тоифасига кирувчи турнир чемпионига айланди. У февраль ойида Дубай турнирида ҳам бош совринга эга чиққанди. 17 ёшли Андреева Мартина Хингис (1998) ва Серена Уильямс (1999)дан кейинги энг ёш BNP Paribas Open чемпиони бўлди.

Индиан-Уэллсдаги муваффақиятли иштирок унга 1000 рейтинг очкоси ҳамда 1 миллион 127 минг 500 АҚШ доллари миқдорида мукофот пулини келтирди. Соболенко эса 650 очко ҳамда 599,625 доллар ишлаб олди.