20 йиллик танаффусдан сўнг рингга қайтган Майк Тайсон бугунги мағлубиятига изоҳ берди

Оқшомнинг асосий жанги супероғир вазн тоифасида собиқ мутлақ жаҳон чемпиони Майк Тайсон ҳамда блогер-боксчи Жейк Пол ўртасида ўтказилди. Икки дақиқадан саккиз раунд тўлиқ давом этган жангда 27 ёшли Пол 58 ёшли Тайсонни очколар (79-73, 79-73, 79-73) ҳисобига кўра мағлубиятга учратди. 

Жангдан кейин афсонавий Тайсон ўз фикрлари билан ўртоқлашди. 

"Бугун кўрсатган жангимдан нафақат хурсандман, балки бахтиёрман. Қийин жанг. Рақибим ҳам яхши жанг кўрсатди ва ўйлайманки, у мухлислар олқишига лойиқ", — деди Темир Майк.

Эслатиб ўтамиз, Майк Тайсон проф рингдаги сўнгги жангини деярли 20 йил олдин, 2005 йилнинг июнь ойида ирландиялик Кевин Макбрайдга қарши ўтказиб, кутилмаганда ютқазиб қўйганди. Унинг ҳисобида 50 ғалаба (44 нокаут) ва 7 мағлубият бор.