11 июл 09:05
Новости

Бокс/ММА

Али Абдел-Азиз: "Ислам Абу-Дабида жанг қилмайди!"

Яримўрта вазн тоифаси чемпиони Жек Делла Маддалена ҳамда енгил вазннинг собиқ чемпиони Ислам Махачев ўртасидаги жанг БАА пойтахтида ўтказилмайди.

Бу ҳақда Махачевнинг менежери Али Абдел-Азиз хабар берди. Унинг айтишича, кўпчилик кутаётган чемпионлик жанги АҚШдаги рақамли турнирларнинг бирида ташкил этилади.

"Ислам Махачев Абу-Дабида жанг қилмайди. Жанг АҚШда, дунёнинг энг катта ареналаридан бирида ўтказилади", – деди Абдел-Азиз Камару Усман ва Генри Сехудо билан "Pound 4 Pound" подкастида.

Аввалроқ, ушбу жангнинг 25 октябрь куни Абу-Даби шаҳрида ташкил этиладиган UFC 321 турнири доирасида ўтказилиши мумкинлиги айтилганди. Энди жанг мезбонлиги учун эҳтимоли жуда юқори бўлган иккита вариант қолмоқда. Биринчиси, 4 октябрь куни Лас-Вегас шаҳридаги "Ти-Мобайл" аренада ўтказиладиган UFC 320, иккинчиси, ноябрь ойида Нью-Йоркдаги "Мэдисон Сквер Гарден" аренасида ташкил этиладиган UFC 322 турнири. Иккинчи вариант ҳақиқатга анча яқин кўринмоқда. Айнан шу турнир ҳақида Ислам Махачев ҳам, Дана Уайт ҳам гапиришган эди.