19 дек 18:58
Новости

Бокс/ММА

Ана холос! Алекс Перейра - Магомед Анкалаев жанги ўтказилмайди

Яримоғир вазн тоифаси UFC рейтингида биринчи ўринни эгаллаб турган россиялик Магомед Анкалаев дивизионнинг амалдаги чемпиони Алекс Перейранинг навбатдаги рақиби бўлмайди.

Бу ҳақда бразилиялик аралаш яккакураш устасининг ўзи ижтимоий тармоқдаги саҳифаси орқали хабар берди.

"Рақибим Анкалаев бўлмайди", - дея қисқа мурожаат ва кўз ёш қилаётган смайлик қолдирган Перейра.

Октябрь ойининг бошида Алекс Перейра учинчи чемпионлик ҳимоя жангини муваффақиятли тарзда ўтказганди. Ўшанда у тўртинчи раундда америкалик Халил Рунтрини техник нокаутга учратган эди. Орадан уч ҳафта ўтиб Магомед Анкалаев даъвогарлар жангида ҳакамларнинг якдил қарори билан австриялик Александр Ракичдан устун келди.

Бир муддат аввал россиялик спортчи 2025 йилнинг май ойида бразилиялик чемпионга қарши октагонга чиқишини маълум қилганди. UFC чемпиони эса бу жанг бўйича музокаралар олиб борилмаётганини айтганди.

Эслатиб ўтамиз, яқинда 37 ёшли Алекс Перейра Лас-Вегасда ўтган World MMA Awards тақдирлаш маросимида "Йил жангчиси" деб топилган эди.