Андижонда белбоғли кураш бўйича халқаро турнир ўтказилди

Мазкур мусобақа кўплаб жаҳон ва Осиё чемпионларини тайёрлаган, спорт устаси, белбоғли кураш бўйича жаҳон чемпиони, вилоят белбоғли кураш федерациясида ижрочи директори сифатида узоқ йиллар фаолият юритиб, юзлаб шогирдлар тайёрлашга эришган марҳум Мамасоли Исмоиловнинг ёрқин хотирасига бағишлаб ташкил этилди. 

Халқаро турнирда белбоғли курашчиларимиздан ташқари қўшни Тожикистон ва Қирғиз Республикаси давлатларидан келган 200 нафарга яқин сара полвонлар 8 та вазн тоифасида ғолиблик йўлида бел олишди. 

Дастлаб халқаро мусобақаниг тантанали очилиш маросими ташкил этилди. 

Унда сўз олган Андижон вилояти спорт бошқармаси бошлиғи Ўткирбек Тошпўлатов, Ўзбекистон белбоғли кураш федерацияси раиси Равшан Дастиров ҳамда Андижон вилоят белбоғли кураш федерацияси раиси Рустам Тўрахоновлар марҳум Мамасоли Исмоиловнинг ҳаётлик чоғида белбоғли кураш спорт турини вилоятда ривожлантириш борасида амалга оширган ишлари ҳақида тўхталиб ўтишди ҳамда мусобақа иштирокчиларига омад тилашди. 

Шундан сўнг турнирга старт берилди. Муросасиз ва қизғин тарзда ўтган беллашувларда асосан мезбонларнинг қўли баланд келди. Ғолиб ва совриндорлар ташкилотчилар томонидан диплом, медаль ҳамда қимматбаҳо эсдалик совғалари билан тақдирланишди. 

Вазн тоифаси бўйича ғолиблар:

-57 кг: Камрон Ортиқов (Булоқбоши тумани)

-62 кг: Абдумалик Дилшодбеков (Олтинкўл тумани)

-68 кг: Ойбек Султонов (Асака тумани) 

-75 кг: Нусратбек Султонбоев (Олтинкўл тумани) 

-82 кг: Ҳусниддин Рўзиев (Олтинкўл тумани) 

-90 кг: Жасур Исроилов (Олтинкўл тумани) 

-100 кг: Ойбек Муҳамедов (Фарғона тумани) 

+100 кг: Аъзам Анваржонов (Олтинкўл тумани)

Илҳом РАҲМОНОВ тайёрлади