30 авг 16:55
Новости

Дзюдо

Барча рақибаларини муддатидан олдин таслим этган Умида Ниғматова жаҳон чемпионати финалида!

Болгария пойтахти София шаҳрида дзюдо бўйича ўсмирлар ўртасидаги жаҳон чемпионатининг сўнгги кунги яккалик баҳслари бўлиб ўтмоқда.

Бироз аввал саралаш баҳслари якунига етиб, кечки финал блокида медаллар учун татамига чиқадиган жуфтликлар маълум бўлди. Қувонарлиси, +78 кг вазн тоифасида юртимиз шарафини ҳимоя қилаётган дзюдочимиз Умида Ниғматова жаҳон чемпионатининг финалига йўл олди.

У франциялик Астан Сако, германиялик Элина Дилгер, туркиялик Ҳатике Балчи, 1/2 финалда чехиялик Кристина Кашперовани мағлубиятга учратди.

Эътиборлиси, Умида Ниғматова барча рақибларини муддатидан аввал таслим этди. Ҳамюртимиз кечки финал дастурида оғир вазн рейтингида 1-ўринни эгаллаб турган франциялик Эмма Фейега қарши баҳс олиб боради. Ниғматова рейтингнинг 26-поғонасидан жой олган. Ўзбек дзюдоси тарихида илк бор оғир вазнда дзюдочимиз финалда татамига чиқади.