Беш ташаббус олимпиадаси: Чирчиқда энг кучли стритбол жамоалари аниқланди

Спортнинг стритбол тури бўйича мусобақанинг “А“ лига республика босқичи баҳслари Чирчиқ Олимпия ва паралимпия спорт турларига тайёрлаш марказида ташкил этилди. Уч кун давом этган қизиқарли беллашувлар иштирокчиларда мусобақа кўникмаси ошишига сабаб бўлган бўлса, ишқибозларга катта спорт завқини тортиқ этди.

Маҳоратли спортчиларни аниқлаш, саралаш билан биргаликда оммавий спорт ривожига катта ҳисса қўшган беллашувлар сарҳисобига кўра, 16-21 ёшли ўғил болалар ўртасида умумжамоада Тошкент вилояти, 22-30 ёш тоифасида Наманган вилояти жамоаси ғолиблик шоҳсупасига кўтарилди. Совринли ўринлар Фарғона, Андижон, Жиззах вилоятлари ва пойтахт жамоаларига насиб этди.

Мусобақанинг аёллар ўртасидаги беллашувларда умумжамо бўйича 16-21 ёшлар тоифасида Тошкент вилояти, 22-30 ёшлар тоифасида эса Сурхондарё вилоятининг стритболчилари 1-ўринни эгаллашди. 2-3-ўринлардан Қашқадарё, Жиззах, Тошкент ҳамда Андижон вилоятларидан келган жамоалар жой олди. Республика босқичида ғолиб ва совриндор бўлганлар диплом, медал ва эсдалик совғалари билан тақдирланди.

Эслатиб ўтамиз, стритбол битта баскетбол ҳалқасида ярим майдонда ўтадиган мусобақа бўлиб, 1950 йиллари Америка Қўшма Штатларда пайдо бўлган. Жамоалар 3 нафардан иборат спортчи билан баҳсларда иштирок этади.