Бир нечта рекордларни такрорлаган Свёнтек мавсумни рейтинг пешқадами сифатида якунлаши мумкин

Бу билан польшалик теннис маликаси бир нечта рекордларни такрорлашга муваффақ бўлди. У 1/2 финалда дунёнинг биринчи ракеткаси, беларуслик Арина Соболенкони мағлубиятга учратди. Бу Иганинг мавсумдаги 67-ғалабаси бўлди. Агар у финалда ҳам зафар қучса, ўзига тегишли бўлиб турган ўтган йилги рекордни янгилайди. 

Бундан ташқари, Свёнтек финал йўлида 19 та геймни (14 та гуруҳ босқичида, 5 та 1/2 финалда) бой берди. Бу билан у бельгиялик Жюстин Эненнинг 2007 йилдаги натижасини такрорлади. 

Ига Свёнтек фаолиятида илк бор дунёнинг амалдаги биринчи ракеткасини мағлубиятга учрата олди. Шу кунгача у икки бор австралиялик Эшли Бартига ютқазганди. Бартидан кейин ўзи сайёрамизнинг биринчи рақамли теннисчисига айланган польшалик 2023 йилнинг сентябригача рейтинг пешқаламлигини ўзида сақлаб турди.

Агар Ига Канкунда WTA Якуний турнири чемпионлигини қўлга киритса, у ҳолда мавсумни жаҳоннинг биринчи ракеткаси сифатида якунлайди. Акс ҳолда Арина Соболенко биринчи ракетка сифатида қолади. Свёнтек бош соврин учун кечадиган финал учрашувида америкалик Жессика Пегулага қарши кортга чиқади.