Болтабоевнинг олтини бизни Astana Barysy Grand Slam`да нечанчи ўринга олиб чиқди? (ФОТОГАЛЕРЕЯ+ЖАДВАЛ)

Мукофот жамғармаси 154 000 еврони ташкил қилувчи Barysy Grand Slam 2024 мусобақасида дунёнинг 5 қитъаси 87 давлатидан жами 455 нафар (238 эркак, 217 аёл) дзюдочи иштирок этмоқда. Улар орасида Ўзбекистон терма жамоаси аъзолари ҳам бор. 

Бугун ўрта вазн тоифасида беллашувлар ташкил этилди ва унда 5 нафар дзюдочимиз медаллар ҳамда Париж-2024 Олимпиадаси йўлидаги қимматли очколар учун татамига чиқишди. Улардан биргина Шарофиддин Болтабоев шоҳсупага кўтарилди. -81 кг вазндаги дзюдочимиз финалда германиялик Тимо Кавелиусни вазари баҳоси эвазига мағлубиятга учратди. Қорақалпоғистонлик дзюдочимиз олтин медаль билан бирга Олимпиада йўлидаги қимматли 1000 рейтинг очкосини ҳам қўлга киритди.   

Бугунги кун қаҳрамони финалга қадар германиялик Доминик Рассел, словениялик Геркович, нейтрал байроқ остида курашган асли россиялик Олимпиада чемпиони Ҳасан Халмурзаев ҳамда япониялик Саторо Фуживарани мағлубиятга учратганди. Шарофиддиннинг олтин медали эвазига Ўзбекистон терма жамоаси 87 давлат орасида 4-ўринга кўтарилиб олди.