21 мар 09:11
Новости

Бугун "Ҳумо" Тошкентда "Бейбарис"га қарши бешинчи ўйинини ўтказади. Бу финал учун сўнгги ўйин бўлиши мумкин!

Тошкентнинг "Ҳумо" хоккей клуби бугун Қозоғистоннинг "Бейбарис" жамоасига қарши плей-офф доирасидаги бешинчи ўйинини ўтказади.

Хоккей бўйича Тошкентнинг "Ҳумо" жамоаси 17 март куни Қозоғистон Очиқ чемпионати плей-оффининг ярим финал босқичи доирасида "Бейбарис"га қарши тўртинчи ўйинда музга чиқиб, 3:2 ҳисобида ғолиб бўлган эди. Ушбу ғалаба орқали жамоамиз сериядаги ҳисобни 3:1 га етказганди.

Бугун "қанотлилар" Тошкентда "Бейбарис"га қарши бешинчи ўйинини ўтказишади. Ғалаба қозонган тақдиримизда финалга йўл оламиз. Бугунги учрашув соат 17:00 да, пойтахтимиздаги "Ҳумо Арена"да бошланади.

Шунингдек, 1/2 финалдан ўрин олган бошқа бир жуфтлик —"Сариарка" ҳамда "Номад" жамоалари ўртасидаги серияда ҳисоб 1:4 кўринишида "Номад" фойдасига якунланди ва жамоа финалга йўл олди.

"Ҳумо"нинг бугунги учрашуви YouTube платформасидаги InSportTV канали орқали трансляция қилинади.