Бугун Ҳусанов "Манчестер Сити" билан илк совринини қўлга киритиши мумкин. Кубок финали учун ПРЕВЬЮ

Англия Кубоги учун мазкур ҳал қилувчи баҳс афсонавий "Уэмбли"да бўлиб ўтади. Унда кутилмаган финалчи "Кристал Пэлас" ва бир мунча омадсиз мавсум ўтказаётган "Манчестер Сити" тўқнаш келади.

"Кристал Пэлас"

1. "Кристал Пэлас" мавсум охирини сифатли тарзда ўтказмоқда
Жорий мавсумнинг иккинчи қисми "бургутлар" учун омадли кечмоқда. Охирги 24 учрашувда 14 ғалаба ва бор йўғи 4 мағлубият. Охирги 5 учрашувда умуман мағлубиятга учрамаган ва уларнинг 3 тасида бевосита ЕЧЛ йўлланмаси учун курашаётган рақиблар билан рўбарў келганди. "Кристал Пэлас" ҳақли равишда Кубок финалигача етиб келди ва ўз тарихида биринчи марта ушбу совринни қўлга киритиш учун бор кучини беради. Лондонликлар бунгача икки бор финалга етиб келган, бироқ ҳар иккисида мағлуб бўлганди.

2. "Кристал Пэлас"нинг энг кучли футболчилари ўйинга тайёр
Мавсумнинг энг муҳим учрашувига "Кристал Пэлас" деярли йўқотишларсиз етиб келди. Фақатгина Адам Уортоннинг иштироки сўроқ остида қолмоқда. 21 ёшли англиялик футболчи "Ноттингем Форест"га қарши ўйинда жароҳат олиб, 61-дақиқада алиштирилган ва "Тоттенхэм" билан ўйинни ўтказиб юборганди. Жефферсон Лерма ва Уилл Хьюз "шпорларга" қарши яхши ўйин ўтказди, лекин асосий таркибда улардан фақат биттаси қолади, чунки Даити Камада учун жой кафолатланган.

3. "Кристал Пэлас" ҳужум чизиғи билан мақтана олади, лекин "Сити"га қарши ўйинлар қийин кечган
Бугунги "Кристал Пэлас"нинг бошыа клублардан ажратиб турувчи жиҳати шундаки — жамоа ёрқин ва ўта ҳужумкор футболни хуш кўради. Натижада, охирги вақтларда клуб камдан-кам ҳолларда майдонни голсиз тарк этмоқда. Турли мусобақаларни инобатга олгандаги 21 та ўйиндан фақат 2 тасида лондонликлар рақиб дарвозасига йўл топа олишмади — "Ньюкасл" ва "Борнмут". Эътиборли томони шундаки, бу оралиқдаги 13 учрашувда "Кристал Пэлас" футболчилари рақиб дарвозасини камида 2 мартадан ишғол этган. Бундан ташқари, "бургутлар" "Сити" билан сўнгги тўрт ўйинда 8та гол уришни уддалашган.

"Манчестер Сити"

1. "Ман Сити" финал олдидан чемпионатда иккита нурсиз ўйин ўтказди
"Ман Сити" чемпионатда ҳам муҳим масалани ҳал қилмоқда — буткул омадсиз мавсумни ЕЧЛ йўлланмасини қўлга киритиш орқали, бироз яхши томонга ўзгартириш мумкиндек. Ҳозирга келиб имкониятлар ҳам жуда яхши, аммо аввалги икки турда "Вулверхэмптон" ва "Саутгемптон"га қарши ўйинлар оғир ўтди. "бўрилар"ни ҳеч бўлмаса кичик ҳисобда таслим эта олган "шаҳарликлар" чемпионатнинг яққол аутсайдери дарвозасига йўл топа олишмади. Ким билади дейсиз, балки жамоа айнан Кубок финалига максимал равишда пухта тайёргарлик кўришни ният қилгандир.

2. Аке, Родри ва Стоунс ҳамон жамоага ёрдам беролмайди
Ҳимоячилар Натан Аке ва Жон Стоунс ўйинни мос равишда тўпиқ ҳамда сонидаги муаммо туфайли ўтказиб юборишга мажбур. Аке яқинда машғулотларга қайтган бўлсада, бу икки футболчи йўқлигига жамоа ўрганиб ҳам улгурди десак, муболаға бўлмайди. "Олтин тўп-2024" соҳиби Родри шу кунларда жамоавий машғулотларга қайтгани ҳақида хабарлар пайдо бўлганди. Бироқ "Кристал Пэлас"га қарши уни майдонда кўришимиз эҳтимоли паст. АПЛнинг охирги турларида эса испаниялик кўриниш берса, ажаб эмас.

3. Охирги вақтларда "Ман Сити"да яратувчанлик билан боғлиқ муаммо бор
Англия Кубогидан аввалги бир нечта учрашувда "шаҳарликлар" ҳужум борасида муаммоларга дуч келди. Ҳаттоки норвегиялик Эрлинг Холанднинг сафга қайтиши ҳам "Саутгемптон" ҳимоясини ёриб ўтиш учун ёрдам бермади, ундан аввалги турда "Сити" "Вулвз"га қарши қийинчиликларга рўбарў келганди. "Астон Вилла" билан ўйиндаги икки голдан ҳам шошилинч хулоса қилмаслик зарур, чунки ўша баҳсда Пеп Гвардиола шогирдлари ўз имкониятларидан максимум равишда фойдаланганди. Аммо "Пэлас" билан ўйинда вазият яхши томонга ўзгариши мумкин, чунки рақибнинг ўзи ҳам ўйинини ҳимоядан қурмайди.