05 окт 13:40
Новости

Теннис

China Open. Соболенконинг 15 ғалабали серияси якунланди

Дунёнинг иккинчи ракеткаси Арина Соболенко Хитой пойтахти Пекин шаҳрида ўтказилаётган турнирдаги иштирокини чорак финалда тўхтатди.

Беларуслик теннис маликаси 1/4 финалда WTA рейтингида 49-поғонада бораётган чехиялик Каролина Муховага уч сет натижасига кўра имкониятни бой бериб қўйди - 6/7(5), 6/2, 4/6. Мухова Арина учун ноқулай рақиба бўлиб қолмоқда. Теннисчиларнинг ўзаро учрашувларида айнан у олдинда бормоқда - 3:1.

Икки соату 48 дақиқа давом этган баҳсда Соболенко 1, Мухова 5 та эйс зарбасини амалга оширган. Брейклар бўйича ҳам Каролина етакчилик қилди - 4 га 3. Мухова ҳал қилувчи учинчи сетда 2/4 ҳисобида ютқаза туриб, ғалабани ўз томонига оғдириб олди. Соболенконинг 15 та учрашувдан иборат ғалабали серияси барҳам топди.