18 ноя 10:44
Новости

Бокс/ММА

Дэвис ва Гарсия келишиб олишди, жанг манзили ҳам аниқ

Иккинчи ярим енгил вазнда жаҳон чемпиони Жервонта Дэвис ҳамда америкалик Райан Гарсия ўзаро жанг ўтказиш бўйича келишувга эришишди.

Бу ҳақда Гарсия ўзининг ижтимоий тармоқдаги саҳифалари орқали хабар берди. Жанг 2023 йилнинг 7 январь куни АҚШнинг Невада штати Лас-Вегас шаҳрида бўлиб ўтади.

"Ниҳоят, бу жанг амалга ошади. Бу ҳақда сизга хабар бераётганимдан бағоятда хурсандман. Мен жуда кўп ишлаяпман, ҳозир фаолиятимнинг юқори чўққисидаман ва дунёнинг буюк боксчиси бўла олишимга ишонаман. Келажак бугундан бошланади", — деди Гарсия.

Ўз ўрнида Дэвис ҳам ижтимоий тармоқдаги саҳифалари орқали ўқувчиларига мурожаат қилиб, Гарсия билан жанг масаласида келишиб олганини эълон қилди.

Аввалроқ, таниқли промоутер, олти вазнда собиқ жаҳон чемпиони Оскар де ла Хойя ҳам Дэвис - Гарсия жанги юзасидан келишувга келингани ҳақида айтган эди.