Дрейк Пэдди Пимблетт ва Молли МакКэннга "Ролекс" соатлари совға қилади

Уларнинг ҳар иккиси ҳам кафолатланган гонорардан ташқари қўшимча бонус, яъни мукофот пулларига ҳам эга чиқишганди. Бу ҳали ҳаммаси эмас экан. Канадалик таниқли қўшиқчи Дрейк инглиз UFC жангчиларини тақдирлашга қарор қилди. 

Гап шундаки, Дрейк Пэдди ва Моллининг ҳар бирининг ғалабаси учун алоҳида миллион доллардан пул тиккан эди. "Ставка"дан яхшигина пул ишлаб олган Дрейк иккала инглиз UFC жангчисига "Ролекс" соати совға қилишга жазм этди. 

Дрейк машҳур қарама-қаршиликларга тотализаторда катта пул тикиши билан танилиб бормоқда. Конор МакГрегор, WBA, IBF ва WBO камарларининг собиқ соҳиби Энтони Жошуа, шунингдек, NFL ва NBA клублари иштирокидаги ўйинларга пул тиккан.

Шу йилнинг март ойида канадалик "ҳофиз" Хорхе Масвидалнинг Колби Ковингтонни мағлуб этиши учун 275 000 доллар тиккан эди. Орадан икки ойча ўтиб, у Жастин Гэтжи - Чарльз Оливейра жангида америкаликнинг ғалабасига 550 000 доллар пул "ставка" қилган. 

Пул тикишда кетма-кет омадсизликка учраган Дрейк тактикани ўзгартирди. У ўрта вазнда UFC чемпиони Исраэль Адесаньянинг Жаред Каннонирга қарши жангдаги ғалабаси учун бир миллион доллар қўйди ва ниҳоят ниятига эришди.

Эслатиб ўтамиз, Лондонда ўтган UFC оқшомида Пэдди Пимблетт иккинчи раундда Жордан Ливиттни бўғиш усули билан мағлуб этган бўлса, Молли МакКэнн биринчи раундда Ханна Голдини нокаутга учратганди.