06 фев 13:06
Новости

Дзюдо

Дзюдо. Париж "Катта Дубулға" турнирида иккита медаль қўлга киритилди

Франция пойтахти Париж шаҳрида "Катта Дубулға" туркумига кирувчи умумий мукофот жамғармаси 154 минг еврони ташкил қилувчи мавсумнинг илк турнири якунига етди.

Икки кун давомида сайёрамизнинг 5 қитъаси 84 давлатидан жами 522 (317 эркак, 205 аёл) нафар дзюдочи мусобақа медаллари ҳамда Париж-2024 Олимпиадаси йўлидаги муҳим рейтинг очколари учун татамига чиқдилар.

Улар қаторида Ўзбекистон терма жамоасининг 7 нафар дзюдочиси Камолиддин Бахтиёров (-60 кг), Сардор Нуриллаев, Бобур Ваджиев (иккиси ҳам -66 кг), Муроджон Йўлдошев (-73 кг), Музаффарбек Тўрабоев (-100 кг), Алишер Юсупов, Шоҳруххон Бахтиёров (иккиси ҳам +100 кг) ҳам ўз маҳоратларини намойиш этишди.

Якунда ҳамюртларимиздан Камолиддин Бахтиёров ва Алишер Юсупов Париж "Катта Дубулға" турнири бронза медали ҳамда қимматли 500 рейтинг (Олимпиада-2024 учун 250 балл) очкосини қўлга киритишди.