Гандбол: 2025 йилги режалар кўриб чиқилди

Қорақалпоғистон Республикаси, вилоятлар ва Тошкент шаҳрининг ҳудудий федерациялари раҳбарлари, Ўзбекистон терма жамоалари тренерлари ва мутахассислар иштирок этган йиғилишда мамлакатимизда гандболни оммалаштириш бўйича кенг кўламли ишлар амалга оширилаётгани айтиб ўтилди.

Хусусан, Халқаро гандбол федерацияси лойиҳаси асосида “Саёҳатчи мураббий” дастури бўйича чет элик етук мутахассисни ишга таклиф қилиш, халқаро мусобақаларда қатнашадиган турли ёш тоифалари бўйича терма жамоалар таркибини шакллантириш мақсадида тегишли вазирлик ва идоралар билан ҳамкорликда “Универсиада”, “Баркамол авлод”, “Беш ташаббус олимпиадаси”, “Талабалар лигаси”, “Мактаб лигаси” сингари спорт ўйинларини юқори савияда ўтказиш масалалари юзасидан сўз юритилди. 

Ўзбекистон гандбол федерацияси раиси Қувондиқ Санақулов мураббий-мутахассисларга жорий йил Халқаро ва Осиё гандбол федерациялари тизимидаги мусобақаларда қатнашиш, шунингдек, гандбол ривожланган мамлакатлар билан манфаатли ҳамкорликни йўлга қўйиш юзасидан вазифаларни берди.

Тадбир давомида Ўзбекистон гандбол федерацияси бош котиби Исмоилжон Матхаликов, эркаклар миллий терма жамоаси катта тренери Улуғбек Икромов ва Ўзбекистон қизлар терма жамоаси тренери Лариса Поповаларнинг ҳисоботлари, жорий йилги режалари тингланди.

Юртимиз гандболчиларининг ютуқ ва муаммолари, тренерлар ва ҳакамлар малакасини ошириш борасида ечимини кутаётган масалалар муҳокамалар марказида бўлди.

Таққослаш учун айтиш лозимки, 2021 йили турли ёш тоифасида 26 та Ўзбекистон чемпионати, биринчиликлари ва кубоги ўтказилган бўлса, 2024 йилда ушбу рақам 30 тани ташкил қилди. Мамлакатимиз жамоалари 2021 йилда жами 7 та жаҳон, Осиё чемпионатлари ва нуфузли халқаро турнирларда қатнашган бўлса, 2024 йилда бу кўрсаткич 12 тага етди. Бу, юртимизда гандболни ривожлантириш ишлари тизимли олиб борилаётганидан далолат.

Йиғилиш якунида кўрилган масалалар юзасидан чора ва тадбирлар режаси ишлаб чиқилиши белгиланди.