Ғиёсов билан эҳтимолий тўқнашуви айтилган Мэнни Пакьяо навбатдаги жанги санасини эълон қилди

Филиппинлик бокс афсонаси 24 январь куни АҚШнинг Лас-Вегас шаҳрида ўтказиладиган проф бокс оқшомида рингга қайтишини ошкор этди ва тез орада рақибининг исм-шарифини эълон қилишга ваъда берди.

"Барча мухлисларимга салом. 24 январь куни Лас-Вегасда рингга қайтишимни мамнуният билан маълум қиламан. Бу ажойиб ва ўзига хос шоу бўлади. Яқин кунларда рақибим ҳақида янгилик бўлади", - деди декабрда 47 ёшга тўладиган Пакьяо ижтимоий тармоқдаги видеосида.

Эслатиб ўтамиз, Пэкмен 4 йиллик танаффусдан сўнг шу йилнинг ёзида профессионал рингга қайтганди. У 19 июль куни Лас-Вегасда бўлиб ўтган ярим ўрта вазн тоифасида WBC чемпиони Марио Барриосга қарши жангда ҳакамлар қарорига кўра дуранг натижа қайд этган эди. Ҳакамларнинг бу қарори Пакьяога ҳам, томошабинларга ҳам ёқмаганди.

Мэнни аввалига Барриос билан иккинчи жангни хоҳлаётганини айтганди, аммо кейинроқ бошқа рақиб излашга киришди. Айни пайтда у январь ойида ярим ўрта вазн тоифасида WBA чемпиони Роландо Ромерога қарши жанг ўтказиш бўйича музокара олиб бормоқда, деб ёзади ESPN.

Дарвоқе, бир неча кун олдин ҳамюртимиз Шаҳрам Ғиёсов бўлажак жанги ҳақида гапириб, январь ойида айнан Паьяо - Ромеро жанги ғолибига қарши рингга чиқишини маълум қилганди.