Grand Swiss. Синдаров ғалаба эвазига пешқадамга айланди, икки Нодирбек ва Шамсиддинда дуранг

Мусобақанинг умумий мукофот жамғармаси 600 000 (460 000 эркаклар, 140 000 аёллар турнири учун) АҚШ долларини ташкил этиб, унда дунёнинг 164 (114 эркак, 50 аёл шахматчилари) нафар гроссмейстерлари ғолиблик йўлида дона суришяпти. Улар қаторида ёш гроссмейстерларимиздан Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидовлар ҳам совринли ўринлар учун баҳс олиб боришмоқда. 

Мусобақа швейцарча тизимда ўтказилаётган бўлиб, кеча турнирда гроссмейстерлар 6-турда ўзаро муносабатларига ойдинлик киритиб олишди. Шахматчиларимиз орасида энг яхши натижа қайд этиб турган Жавоҳир Синдаров (2658) қора доналарда ўйнашига қарамай, рейтингда ўзидан юқорида турган америкалик Самуэль Севиан (2698)ни мағлубиятга учратди. Нодирбек Якуббоев (2616) оқ доналарда рейтингда ўзидан юқорида жойлашган германиялик Винсент Кеймер (2717) билан дуранг ўйнади. 

Биринчи рақамли шахматчимиз Нодирбек Абдусатторов (2716) бу турда оқ доналарда ҳиндистонлик Читамбарам Аравиндҳ (2649) билан муросага келди. Шамсиддин Воҳидов (2578) эса оқ доналарда нидерландиялик Макс Вармердам (2636) билан дурангга имзо чекди. 

Эътиборга молик жиҳати шундаки, мағлубиятсиз одимлаётган Жавоҳир Синдаров кечаги ғалабаси эвазига 4,5 очко билан турнир жадвалида қўшимча кўрсаткичларга кўра иккинчи ўринга кўтарилиб олди. Сербиялик пешқадам Александр Предке ҳисобида ҳам 4,5 очко бор. Саккиз нафар шахматчи 4,5 тадан очко жамғаришган. Тўрт очкога эга Нодирбек Якуббоев кучли ўнталикка якун ясаб берган. Нодирбек Абдусатторовда 3,5, Шамсиддин Воҳидов ҳисобида эса 2,5 очко бор. 

Бугун шахматчилар учун дам олиш куни сифатида эълон қилинган.

Эртага ўтказиладиган 7-тур жуфтликлари:

Жавоҳир Синдаров (2658) - Гужратҳи Видит (Ҳиндистон, 2716)

Богдан-Даниэль Дяк (Руминия, 2701) - Нодирбек Якуббоев (2616)

Евгений Наер (Россия, 2648) - Нодирбек Абдусатторов (2716)

Амин Бассем (Миср, 2680) - Шамсиддин Воҳидов (2578)