24 мар 11:10
Новости

Теннис

Ҳумоюн Султонов Чандигарҳ турнири чемпиони!

Ҳиндистоннинг Чандигарҳ шаҳрида теннис бўйича M15 тоифасига кирувчи турнир ўз якунига етди.

Мукофот жамғармаси 15 000 долларни ташкил қилган ушбу мусобақада ҳамюртимиз Ҳумоюн Султонов ҳам муваффақиятли иштирок этди. Мамлакатимизнинг биринчи ракеткаси ҳозиргина якунига етган финал баҳсида ғалабага эришиб, мусобақа бош совринини қўлга киритди.

Чандигарҳ турнирида биринчи рақам остида таснифланган Султонов 93 дақиқа давом этган финал учрашувида мусобақанинг иккинчи ракеткаси ҳисобланган Рамкумар Раманатанни 6/4, 6/2 ҳисобида мағлубиятга учратди.

Рамкумарга 11 та эйс зарбаси ҳам ёрдам бермади. Ҳумоюн бу борада 4 та эйсни амалга оширган. Қўшхатолар 6 га 0 кўринишида мезбон теннисчи "фойдаси"га бўлди.

Таққослаш учун, Ҳумоюн Султонов ATP рейтингида 331, Рамкумар Раманатан эса 410-поғонадан жой олган.